PROVINCE OF CEBU- Nasikop sa usa ka adlaw nga gipakusog nga operasyon sa Cebu Police Provincial Office sa lalawigan sa Sugbo ang kapin 300 ka indibidwal nga nakalapas sa lokal nga ordinansa.
Sa report sa CPPO, gahapon Abril 23, 2026, miabot sa 121 ka police operations ang gipahigayon ilalom sa OPLAN Bulabog, OPLAN Sita, ug Night Watch, isip suporta sa Safer Cities Initiative.
Miresulta kini sa 362 ka mga violators nga nadakpan, nga naglakip sa 150 ka traffic violations, 90 ka curfew violations sa mga menor de edad, ug 72 ka kaso sa pag-inom sa pampublikong lugar.
Lakip usab sa nadakpan ang 31 ka tawo nga naglatagaw nga walay hustong sapot, 10 ka kaso sa paglapas sa oras sa karaoke, ug 9 ka kaso sa pagpanigarilyo sa pampublikong lugar.
Sa maong gidaghanon, anaa sa 212 ang gipasidan-an ug gipagawas, samtang ang uban gipamultahan og kinatibuk-ang ₱68,000.
Gipasiugda ni PCOL Abubakar Udang Mangelen Jr., Provincial Director sa Cebu Police Provincial Office, ang kamahinungdanon sa padayon nga pagpatuman sa balaod ug kooperasyon sa publiko aron makab-ot ang mas luwas nga mga komunidad.
Dugang pa, nga magpadayon sila sa maong mga operasyon aron mapalig-on ang disiplina, kahapsay, ug kaluwasan sa tibuok Sugbo.
