Nanawagan si Vice President Sara Duterte sa mga bag-ong opisyal sa Philippine Military Academy “Talang Dangal” Class of 2026 nga ipadayon ang integridad, disiplina, ug kaisog sa ilang serbisyo atol sa graduation ceremony sa Fort Del Pilar sa Baguio City.
Sa iyang mensahe, giingon ni Duterte nga ang ilang pagbansay sa PMA maoy naghatag kanila og lig-on nga pundasyon sa disiplina, sakripisyo, ug pagpangulo nga ilang magamit sa pagdepensa sa nasud.
Giawhag usab niya ang mga kadete nga mahimong ehemplo sa dungog ug dignidad samtang magpabiling lig-on batok sa bisan unsang hulga sa soberanya sa Pilipinas.
Gipasalamatan sa Bise Presidente ang mga gradwado sa pagpili sa dalan sa serbisyo militar, nga iyang gihulagway nga usa ka dungganon nga propesyon nga gipahinungod alang sa kaayohan ug kaluwasan sa katawhang Pilipino.
Dugang pa ni Duterte, ang ilang pagserbisyo nagpakita sa determinasyon sa pagdepensa sa nasud ug pagpanalipod sa kagawasan sa katawhan.
Sa katapusan, iyang gipahalipayan ang mga gradwado ug ang ilang mga pamilya isip kabahin sa bag-ong henerasyon sa mga tigpanalipod sa nasud.
