CEBU CITY-Gikalipay nga gipahibalo sa kadagkoan sa kapulisan sa Dakbayan sa Sugbo nga nikunhod ang ‘Crime Incidents’ sa Dakbayan ning tuiga kung itandi sa mga nakalabay nga tuig.
Mao kini ang gipaambit ni Police Col. Ireneo Dalogdog, ang City Director sa Cebu City Police Office, human nga ang ilang stratehiya nakapokus sa mga ‘Crime Prone Areas’, ug gipadalhan og mga sakop sa kapulisan arun sa pagbantay sa maong mga lugar.
Dugang pa sa opisyal nga dili kini mahimo sa mga kapulisan kung wala ang tabang sa mga Barangay Officials ug mga tanod nga ilahang nahimong kaabag sa pagpatrolya ilabi na sa pagtak-om sa adlaw.
Hinungdan nga dako ang ilang pasalamat sa pag-abag ug naka-ingon sa pagkab-ot sa kalinaw ug kahapsay sa Dakbayan.
Gipasalamatan usab sa opisyal ang katawhan sa Dakbayan sa Sugbo sa kooperasyon nga ilahang gihatag sa kapulisan.
Kana gumikan dili sila mahimong epektibo ug malampuson kung wala ang kooperasyon sa katawhan.
Ingon man nga mi-awhag kini sa tanang Sugboanon nga padayon nga mosuporta gumikan kusganong gituohan niini nga pinaagi sa pagtinabangay, mas dali nga masulbad ang mga problema ilabi na sa pagmintinar sa ‘Peace and Order’ sa Dakbayan.
