Giangkon sa Civil Service Commission (CSC) nga walay balaod nga tataw nga nagdili sa mga kawani ug opisyal sa gobyerno sa pagsugal sa legal nga mga casino o online gambling sites human sa trabaho.
Matod ni CSC Chairperson Marilyn Barua-Yap atol sa budget hearing alang sa gisugyot nga P4.19 bilyones nga budget sa ahensya alang sa 2026, usa lang ka Executive Order ang nagdili sa mga kawani sa gobyerno sa pagsulod sa mga establisemento sa sugal sa oras sa pagtrabaho.
Gipasabot usab ni Barua-Yap nga legal ang pipila ka matang sa sugal sama sa lisensiyado nga mga casino ug online platforms. Busa, walay igong legal nga basehan ang pagdili niini alang sa mga kawani sa gobyerno kon dili kini himoon atol sa ilang oras sa pagtrabaho.
Dugang pa niya nga mas maayo nga ang matag ahensya sa gobyerno maghimo ug kaugalingong guidelines aron mamintinar ang disiplina ug pagsalig sa publiko.
Samtang, ang Philippine Amusement and Gaming Corporation (PAGCOR) nitaho nga ang kita gikan sa online nga sugal niabot og P155 bilyones sa 2021, ug gilauman nga moabot og P60–P62 bilyones sa 2025 kon walay total ban nga ipatuman.
