CEBU – Mipahimangno ang City of Talisay Traffic Operations & Development Authority (CT-TODA) sa mga drayber nga kanunay mag-amping kung mu-agi sa Cebu South Coastal Road (SRP).
Gibutyag ni CT-TODA head Jonathan ‘Joy’ Tumulak nga bisan unsa pa man ang sitwasyon, gikinahanglan nga adunay tukma nga distansya sa isig ka sakyanan, ingon man kanunay susihon ang brakes una mubyahe ug ang paggamit ug seatbelt arun nga malikayan ang disgrasya kung adunay kalit nga paghunong sa sakyanan.
Kini ang pahinumdom ni Tumulak human nga tulo ka mga sakyanan ang nag-karambola sa SRP sa bahin sa dakbayan sa Talisay human nga usa ka taxi nga nagsubay sa outer lane ang ning menor ang nabangga-an ug usa ka drump truck nga walay karga.
Gidugang pa, sa dihang mibangga ang maong dump truck ang nabangga sa naasoy nga taxi, usa usab ka wing van nga adunay karga nga mga sinako nga lawog ang mibangga usab ngadto sa truck.
Hinuon, bugtong mga damage lang sa mga nalambigit nga sakyanan ang natala ug wala may namatay, gawas na lang sa gamay nga gasgas sa tuhod sa driver sa dump truck.
Sa pagkakarun, ang mga nalambigit ang na-isyuhan ug violation ticket gikan sa CT-TODA, samtang na-settle lang usab ang mga driver.
