Daghang mga trucycle drivers ang wala makadawat sa P5,000 nga tabang pinansyal gikan sa gobyerno taliwala sa padayon nga pagsaka sa presyo sa krudo, human ang ilang mga pangalan wala makita sa listahan sa mga benepisyaryo.
Sumala sa mga report, daghang mga miyembro sa Batasan TODA ang sayo nga naglinya sa Department of Social Welfare and Development (DSWD) payout center sa Batasan Hills, Quezon City kagahapon, Marso 17.
Sumala sa pipila ka mga drayber, kinahanglan silang maghulat og mga 30 minutos sa dili pa mosulod sa payout area, samtang ang uban milungtad og pipila ka oras.
Ang kinahanglan lang nilang buhaton mao ang pagpakita sa ilang lisensya sa pagmaneho ug usa ka photocopy niini aron makadawat sa tabang.
Apan, gikan sa kapin sa 2,000 ka mga miyembro sa BATODA, kapin sa 1,500 lang ang nalakip sa master list. Tungod niini, daghang mga drayber ang mireklamo nganong wala sila nalakip bisan pa man og dugay na silang nagbiyahe.
Gipasabot sa presidente sa BATODA nga si Genlie Pesico, nga ang ubang mga ngalan temporaryo nga wala gilakip tungod sa kakulang sa mga detalye sama sa middle initial o petsa sa pagkatawo.
Sa Barangay Holy Spirit, adunay usab mga drayber nga wala makita ang mga pangalan sa listahan bisan pa nga nalakip sila sa kaniadto nga gipagawas nga lista.
Gipasalig ni DSWD Secretary Rex Gatchalian nga ang tanang mga drayber sa traysikol makadawat og ayuda. Matud niini nga ang pagsumiter ug pag-andam sa lista sa mga benepisyaryo nagpadayon pa.
Base sa rekord sa ahensya, moabot sa 139,000 ka mga drayber sa traysikol sa Metro Manila ang target nga hatagan og ayuda gikan sa Assistance to Individuals in Crisis Situations (AICS) fund.
Human niini, gilauman usab nga makadawat sa samang ayuda ang ubang mga drayber sa public utility vehicle sa umaabot nga mga adlaw.
Samtang, giaprobahan sa Department of Transportation ang P1 nga pagtaas sa plete para sa tradisyonal nga mga jeepney. Apan sumala sa transport group nga MANIBELA, dili pa kini igo, busa ang plano sa lihok protesta sa transportasyon sa tibuok nasud magpadayon sa Huwebes, Marso 19, 2026.
