CEBU – Subay sa kasaulogan sa 85th Cebu City Charter Day, kagahapong adlawa Huwebes, Pebrero 24,2022, madasigon nga gi-anunsiyo ni Cebu City Mayor Mike Rama ang paglibkas sa curfew sa dakbayan.
Kini ubos sa bag-ong direktiba o Executive Order No. 163 nga ginganlan og ” Oplan Kagawasan” ni Mayor Rama nga tangtangon na ang curfew apan dili lakip niini ang curfew sa mga menor de edad kung diin magpabilin sa gihapon sa alas 11 sa gabie ngadto na sa alas 4 sa kadlawon.
Gawas niin, gipahibaw usab ni Rama nga mamahimo na nga makasulod ang mga Sugboanon sa nagkadaiyang establisyemento bisan paman dili kini mopresentar og vaccination card dungan sa pagbutyag nga mamahimo na nga mangabli ang tanang establishemento sa dakbayan.
Apan, dungan sa maong pag-anunsiyo gitino ni Rama sa katawhan nga sa kagawasan nga gihatag angayan nga magmatngon sa isig kaugalingon aron magpabilin nga himsog ilabi na ang padayon nga pagsunod sa minimum public health standard protocols.
Gipahimangnoan usab ang mga establisyemento nga hugot gihapon nga ipatuman ang pagsul-ob sa face mask, social distancing, kanunay nga paghugas sa kamot o paggamit og disinfectant.
