MINGLANILLA, CEBU-Gikataho sa Lungsod sa Kapulisan sa Minglanilla nga ilang nasulbad ang tulo ka mga armadong tulis nga gi-report sa estasyonan gikan sa Enero hangtod Hulyo ning tuiga, apan nakaabot ang impormasyon ni Mayor Rajiv Enad nga adunay uban pang mga tulis diin ang mga biktima wala gyud magpakabana sa pagreport sa pulisya.
Tungod niini, gimando ni Mayor Rajiv ang mga estratehiya aron makunhuran ang problema sama sa: dinaliang pagpatuman sa curfew gikan sa alas 10 sa gabii hangtod sa alas 5 sa buntag ug ang pagpahigayon ug intensive random checkpoints sa tanang barangay.
Magtukod ug federation sa mga habal-habal drivers nga hatagan ug color coded ug numbered uniforms ug IDs. Kini aron mailhan sa riding public ug lokal nga awtoridad ang mga kasaligan ug giila nga mga drayber nga luwas sa transportasyon. Ang mga bayranan sa pamasahe padayon pang gituki sa Konseho sa Munisipyo.
Ingun man ang pagmando sa mga barangay kapitan nga adunay direktang linya sa komunikasyon sa hepe sa kapolisan aron matubag ang problema sa mga biktima nga nagdumili sa pagtaho sa mga insidente.
Mag-amendar usab ang Konseho sa Munisipyo ug Curfew Ordinance aron maapil ang silot sa mga ginikanan sa mga menor de edad nga madakpan nga magsuroysuroy sa mga lugar o establisemento atol sa curfew hours.
Gipanglanatwan sa Panggamhanan sa Munisipyo ang paghatag ug dugang nga ngipon sa ilang kampanya batok sa kriminalidad pinaagi sa pag-usab sa paggamit sa Republic Act 7610 o ang Special Protection of Children Against Abuse, Exploitation and Discrimination ubos sa mga sirkumstansya ug ipasaka ang katugbang nga reklamong kriminal.
Nihangyo usab sila sa Napolcom nga usbon ang klasipikasyon sa Minglanilla gikan sa Class B ngadto sa Class A aron tugotan kini nga adunay mas daghang pulis.
Basi sa record sa mga otoridad adunay unom ka mga armadong tulis sa miaging lima ka semana, lakip na kadtong wala matala sa blotter.
Samtang gikan sa Mayo 9 hangtod Hulyo 30 ning tuiga, 9 ka tawo ang nasikop sa Minglanilla Police tungod sa illegal possession of firearms, ug 16 ka armas ang nasakmit.
Dugang pa, nga ang mga tanod pagabansayon usab aron magamit sila sa citizens’ arrest.
