Ginganlan sa kontraktor nga si Curlee Discaya ang unom ka kongresista ug duha pa ka kanhing opisyal sa gobyerno nga giingong nakadawat og kickback gikan sa mga proyekto sa pagkontrol sa baha nga naa sa usa sa iyang mga payoff ledger.
Lakip sa mga ginganlan ni Curlee atol sa hearing sa Senate Blue Ribbon Committee niadtong Biyernes, Nobyembre 14, mao ang kanhi ug karon nga mga kongresista nga sila si Pasig City Rep. Roman Romulo, kanhi Quezon City 4th District Rep. Marvin Rillo, Caloocan City 3rd District Rep. Dean Asistio, Quezon City 5th District Rep. Patrick Vargas, Quezon City, 6th District Rep. Ma. Victoria Co-Pilar ug Uswag Ilonggo Partylist Rep. James “Jojo” Ang.
Ginganlan usab ang kanhing Presidential Assistant for the Visayas nga si Terence Calatrava ug kanhing Department of Public Works and Highways (DPWH) Undersecretary Roberto Bernardo.
Matud ni Curlee, nga aduna pa’y ledger sa ilang pinuy-anan, apan wala nila kini makuha tungod sa kakulang sa oras.
Gisumiter sa magtiayong Discaya ang nasakmit nga ledger ngadto sa Senate Blue Ribbon Committee.
Una niini, ang Senate Blue Ribbon Committee temporaryong nagtugot kang Curlee ug Sara Discaya nga mobiya sa hearing sa flood control anomaly aron kuhaon ang mga dokumento nga giingong adunay impormasyon bahin sa mga indibidwal nga nalambigit sa eskandalo.
