Nasugdan na ang gikahinam nga Central Visayas Regional Athletic Association (CVRAA) Meet 2026 sa dakbayan sa Naga sa habagatang Sugbo kagahapong adlawa sa Domingo, Marso 22, 2026.
Sa pakighinabi sa Bombo Radyo Cebu News Team kang Dr. Salustiano Jimenez, ang Regional Director sa Department of Education – Central Visayas (DepEd-7) kay gihulagway niini ang kasamtangang edisyon sa CVIRAA karong tuiga nga makahuluganon tungod kay aduna nalay 12 ka mga schools division ang magtigi human ang Sugbo ug Bohol ang nahabilin sa rehiyon mugna sa pagtukod sa Negros Island Region diin gilakipan na sa Negros Oriental ug Siquijor.
Aduna nalang 12 ka mga schools division ang magsangka karong tuiga gikan na nakalabay nga 20 ka schools division.
Gani dugang pa ni Dr. Jimenez nga bisan man og dili sobra ka engrande ang CVIRAA 2026 tungod na sab sa mga delubyo nga miigo sa rehiyon niadtong 2025 ug sa bag-ohay lang nga kalibutanong krisis nga nasinati apan adunay gihapon kiniy ikabuga nga kanindot alang mga student-athletes nga nisalmot.
Ang CVIRAA Meet 2026 kay dili lang gihikay sa dakbayan sa Naga tungod kay co-host pud ang probinsya sa Sugbo niini diin pipila ka mga sporting events kay gipahigayon sa ubang syudad ug lungsod pabor sa habagatang Sugbo.
Mulanat hangtod sa Sabado, Marso 28 ang maong kalihukan diin ang mga mananaog sa mga kompetisyon kay maoy itugyan nga pambato sa rehiyon sa umaabot Palarong Pambansa 2026 sa Prosperidad, Agusan del Sur.
