Gipasalig sa Department of Agriculture (DA) nga ang programa sa gobyerno nga pagbaligya og bugas sa P20 kada kilo magpadayon hangtod sa katapusan sa termino ni Presidente Ferdinand Marcos Jr. sa 2028.
Sumala sa DA, ang ahensya komitado sa pagpadayon sa programa alang sa mga kwalipikado nga benepisyaryo.
Sa iyang State of the Nation Address, ang Presidente miingon nga kapin sa 12 milyon nga mga Pilipino ang nakabenepisyo na sa “Benteng Bigas, Meron Na,” usa ka programa nga gitumong sa mga mahuyang nga sektor.
Diin ang barato nga bugas gikan sa stock sa National Food Authority (NFA), nga direktang mopalit og bugas gikan sa mga lokal nga mag-uuma. Gisuportahan sa gobyerno ang programa pinaagi sa Food Terminal Inc. (FTI).
Sumala sa DA, ang NFA karon adunay kapin sa 500,000 metriko tonelada nga bugas sa stock, nga giingon nga igo na aron matubag ang mga panginahanglanon sa programa.
Gikan sa kasamtangang 807 ka Kadiwa sites sa tibuok nasud, ang DA nagtumong nga madugangan kini ngadto sa tali sa 1,500 ngadto sa 2,000 ka sites sa umaabot nga mga bulan.
Samtang, ang DA miingon usab nga ang presyo sa bugas sa merkado anam-anam nga mikunhod.
Ang premium nga bugas gibaligya karon sa P47 ngadto sa P48 kada kilo, samtang ang regular nga giling nga bugas anaa sa P35 ngadto sa P45 kada kilo.
Sumala sa DA, ang kasamtangang suplay sa bugas, lokal ug imported, igo na aron matubag ang mga panginahanglan sa matag Pilipino hangtod sa sunod nga ani.
Ang gobyerno miingon usab nga wala kini plano nga idili ang pag-import sa bugas, labi na samtang ang nasud nangandam alang sa posibleng epekto sa El Niño sa suplay sa pagkaon sa umaabot nga mga bulan.
