CEBU – Giila ang Dumaguete City isip 1st Most Improved Component City sa Pilipinas atol sa 10th Cities and Municipalities Competitiveness Summit nga gipahigayon sa Philippine International Convention Center karong adlawa.
Gisundan kini sa syudad sa Bogo nga mipwesto sa ikaduha sa maong pasidungog.
Si Mayor Felipe Antonio Remollo, Acting Vice-Mayor Karissa Tolentino-Maxino, Councilor Dionie Amores ug DTI-Negros Oriental Provincial Director Nimfa Virtucio maoy midawat sa pasidungog alang sa City Government sa Dumaguete.
Ang Cities and Municipalities Competitiveness Summit maoy usa sa mga Programa sa DTI Competitiveness Bureau nga nag-awhag sa mga LGUs sa pagtigom ug pagsumiter sa mga datos nga nagsilbing basehan sa ilang mga score ug ranggo.
Sukad niadtong 2012, nitapos ang CMCI Program sa usa ka Summit, diin ang most competitive nga mga syudad ug lungsod giila nga labing maayo sa 5 Competitiveness Pillars nga mao ang Economic Dynamism, Government Efficiency, Infrastructure, Resiliency ug Innovation.
Gihimo ang summit karong tuiga nga adunay tema nga “A Decade of Excellence: Championing Innovation to Sustain Competitiveness.”
Nakuha usab sa lungsod sa Ronda ang ikatulong pwesto sa Most Competitive Infrastructure ug nag-una ang lungsod sa Argao sa Most Competitive: Innovation.
