Gilusad sa Kagamhanan sa dakbayan sa Mandaue ang pagpahigayon og rehabilitasyon sa Butuanon River, uban sa pagpakig-alayon sa usa ka higanteng kompaniya sa nasod, ang San Miguel Corporation (SMC), pinaagi sa inisyatiba niining Better Rivers PH.
Matud ni Jimmy Lu, bise presidente ug overall project manager sa SMC Better Rivers PH, ang Mandaue City maoy unang siyudad gawas sa Luzon, diin palapdan nila ang ilang clean-up efforts.
Moabot sa upat ka kilometros ang gitas-on nga bahin sa Butuanon River, ang ilang limpyohan ug target nila nga mahuman kini sa dili pa ang Abril sa sunod tuig.
Ipatuman kini nga walay gastuon ang gobyerno agi og suporta sa Oplan Kontra Baha (OKB) nga inisyatiba sa kagamhanan.
Unom ka excavators ug modular barges ang gi-deploy sa SMC alang niining inisyatiba ug ang maong mga ekipo mao usab ang gigamit sa river clean-up sa Pasig River.
Apil sa ilang buhaton ang pagkuha sa lapok, pagpailawom sa Butuanon River sa dredging operations ug pagkuha sa mga basura.
Gilusad kagahapong adlawa Hunyo 18, 2026 ang River Clean-Up sa Butuanon River sa Barangay Umapad sa Mandaue diin magtambayayongay ang Department of Public Works and Highways, Department of Environment and Natural Resources, SMC pinaagi sa ilang Better Rivers PH initiative, ug local government unit (LGU) sa siyudad sa Mandaue.
Tumong niini nga inisyatiba nga makab-ot ang usa ka madasigon, limpyo, ug flood-resilient nga Butuanon River diin usa kini sa mga lakang isip sayong pagpangandam aron mapadali ang bul-og sa tubig ug mapanalipdan ang lugar nga duol niini batok sa baha ilabi na sa panahon sa ting-uwan.
Giangkon ni Mandaue City Mayor Thadeo Jovito “Jonkie” Ouano nga dili kaya sa lokal nga kagamhanan kon sila lang ang mobuhat niini, nanginahanglan sila sa suporta gikan sa nasudnong kagamhanan, probinsya sa Sugbo, ug mga negosyante o pribadong sektor.
Lakip sa mitambong sa kalihokan si DPWH Undersecretary for special concerns Charles Calima, task force commander sa OKB ug DPWH 7 Regional Director Simon Arias nga pulos nagpasalamat sa SMC.
Anaa usab ang ubang mga opisyal sa siyudad, sa mga barangay ug sa SMC.
