Gipalig-on sa mga dialogue partners sa ASEAN nga mao ang Japan, Republic of Korea, ug China ang ekonomiya sa turismo sa rehiyon nga maoy naghatag og dakong suporta sa panginabuhi sa mga komunidad. Atol sa 48th Meeting sa ASEAN Plus Three National Tourism Organizations, gipasiugdahan ni Department of Tourism Undersecretary Verna Buensuceso, uban ni Co-Chair Hironobu Nara sa Japan Tourism Agency, ang kamahinungdanon sa kooperasyon sa matag nasod pinaagi sa Tourism Cooperation Work Plan 2021–2025 alang sa hiniusang kalambuan sa tibuok Asya.
Samtang nagpadayon ang maong mga panaghisgot, nangandam usab ang kagamhanan sa Dakbayan sa Sugbo ubos ni Mayor Nestor Archival alang sa usa ka magarbohong cultural tour para sa mga delegado. Sugaton ang mga bisita og hugot nga security arrangement sa ilang pag-abot sa City Hall, diin duna’y ipahigayon nga welcome ceremony, pasundayag sa mga Sinulog dancers, ug usa ka reenactment sa kasaysayan sa Sugbo.Human niini, mopadayon ang mga delegado sa Basilica Minore del Sto. Niño alang sa sighting sa Magellan’s Cross.
Gihimug-atan usab ni Mayor Archival nga gawas sa kultura, usa sa angay ipasigarbo mao ang pagkarelihiyoso sa mga Sugboanon, ilabi na ang Magellan’s Cross nga nagsilbing cradle of Christianity sa tibuok Asya. Gilauman nga pinaagi niini, mas mapalapdan pa ang kasayuran sa mga bisita bahin sa espirituhanong kabilin sa siyudad.
Samtang sa ASEAN Delegates Tour, magagikan kini sa Basilica, og molahus sa Parian sa Heritage of Cebu Monument, Fort San Pedro, Malacañang sa Sugbo (Heritage Museum), ug Casa Gorordo nga maoy katapusang bahin sa tour sa dili pa sila itunol sa pagdumala sa Department of Tourism (DOT).
Giandam na sab sa Cebu City Government ang duha ka electric buses nga maoy gamiton sa maong tour aron masiguro ang kaharuhay sa mga langyaw’ng bisita.
Gumikan niining maong kalihokan, gipahibalo ang mga motorista nga gipaabot ang paghuot sa trapiko sa downtown area, partikular na sa mga karsada sa M.C. Briones, P. Burgos, Mabini St., ug dapit sa Fort San Pedro. Giawhag ang publiko sa pagpangita og alternatibong rota samtang gipahigayon ang maong importanteng aktibidad sa dakbayan.
Dungan usab nga gimando ni Mayor Archival ang pagbalhin sa tanang klase ngadto sa hybrid o modular learning sa tibuok Dakbayan sa Sugbo karong Enero 28 hangtod 29, 2026.
Kini nga kamanduan naglangkob sa tanang lebel sa pampubliko ug pribadong tunghaan agig tubag sa hangyo sa PNP alang sa mas hugot nga seguridad sa nagpadayong ASEAN Summit 2026.
Tumong niini nga masiguro ang kaluwasan sa mga estudyante ug magtutudlo, ingon man ang hapsay nga paglihok sa mga delegado sa siyudad.
