CEBU – Mangita og bag-ong lokasyon ang Cebu City Police Office (CCPO) alang sa barangay Mambaling police station.
Nagkanayun si Police Col. Ireneo Dalogdog, CCPO director, nga ang edipisyo nga giokupar sa estasyonan sa niaging mga tuig gipanag-iya sa barangay, gawas pa, karaan na kini.
Matod niya nahibawo na niini si Mayor Michael Rama ug niuyon nga ibalhin ang police station.
Ang hepe sa CCPO niingon nga ang mayor nipasalig kanila nga ang City Government motukod og building alang sa Police Station 11 sa higayon nga makakita na kini og lote.
Usa sa mga lugar nga gitun-an mao ang South Road Properties, apan dili kini dali nga maabot sa publiko.
Matod ni Dalogdog nga lain nilang option mao ang pagpangita og lote sa laing barangay nga sakop sa hurisdiksyon sa Police Station 11.
Gawas sa Mambaling Police Station, ang ubang police stations nga walay kaugalingong building mao ang Talamban Police Station ug Labangon Police Station.
