Gisugdan sa Kagamhanan sa Probinsya sa Sugbo niadtong miaging Huwebes ug Biyernes, Pebrero 26 ug 27, 2026, ang usa ka “boarding and alighting field survey” nga naglangkob sa mga dagkong rota sa biyahe gikan sa Cebu South Bus Terminal.
Ang maong survey, nga gihimo sa Local Public Transport Route Plan (LPTRP) team sa Provincial Planning and Development Office (PPDO), nagtigom og mga datos bahin sa gidaghanon sa mga pasahero, peak hours, mga dapit sa pagsaka ug pagkanaog, ug ang mga pattern sa panginahanglanon sa pagbiyahe.
Ang LPTRP usa ka plano alang sa kalamboan sa transportasyon nga gihulma sa PPDO sa lebel sa probinsya, inubanan sa koordinasyon sa Land Transportation Franchising and Regulatory Board (LTFRB), Department of Transportation (DOTr), mga local government units sa Sugbo, ug mga transport operators nga nitabang ilabi na sa pagpundok sa datos ug mga konsultasyon.
Tumong sa maong survey nga mapalambo ang kaepektibo sa rota, mapanindot ang mga serbisyo, ug maseguro ang mas luwas ug mas komportable nga pagbiyahe sa Sugbo.
Ang kalihukan niadtong Huwebes ug Biyernes nagtimaan sa pagsugod sa serye sa mga pagtuon sa transportasyon sa tibuok probinsya karong tuiga, lakip na ang pagsusi sa license plate, pag-ihap sa sakyanan ug pasahero, terminal dispatch ug arrival, ug mga interview sa mga drayber, operator, ug pasahero.
Gipakita niini nga survey ang lig-on nga tinguha ni Gobernador Pamela S. Baricuatro alang sa usa ka “data-driven planning” aron makab-ot ang mas episyente ug andam-sa-kaugmaon nga sistema sa publikong transportasyon sa tibuok lalawigan sa Sugbo.
Sa piho nga bahin, gisusi sa LPTRP team ang rota paingon sa Bato Port, Samboan via Oslob ug Barili, ingon man ang mga piniling inter-municipal nga rota sa habagatang Sugbo.
Tinguha sa maong team nga ipahigayon ang survey sa tanang mokabat 300 ka mga rota sulod sa probinsya sa Sugbo.
