Miaprubar ang Department of Budget and Management (DBM) og P1.68-bilyones nga pundo para sa pagpuno sa Quick Response Funds (QRF) sa Department of Agriculture (DA), Department of Social Welfare and Development (DSWD), ug Philippine Coast Guard (PCG) aron mapadali ang pagtubag sa kalamidad.
Sumala sa DBM, P1-bilyon ang gigahin sa DA para sa mga programa sa rehabilitasyon sa mga rehiyon nga naigo sa bagyo ug isip standby fund para sa mga mag-uuma ug mangingisda nga maapektuhan sa umaabot nga mga kalamidad.
Matod pa ni DBM Secretary Amenah Pangandaman nga ang mga bagyo nakaapektar pag-ayo sa sektor sa agrikultura, busa giaprobahan dayon nila ang hangyo sa DA nga pun-on ang QRF.
Samtang, ang DBM migahin og P631-milyones para sa DSWD nga gamiton sa pagpalit og mga family food packs, mga non-food items, ug emergency cash transfers para sa mga pamilya nga naapektuhan sa kalamidad, nga gilauman nga makabenepisyo sa halos 59,000 ka pamilya.
Dugang pa, niadtong Oktubre, ang DBM mipagawas usab og P1.98-bilyones para sa DSWD QRF.
Ang Philippine Coast Guard nakadawat og P53 milyon para sa ilang relief, rehabilitation, ug search-and-rescue operations sa mga apektadong lugar.
Sa pagkakaron, ang Bagyong Uwan nagkahuyang samtang nagpalayo sa nasud. Sumala sa mga awtoridad, duha ka tawo ang namatay ug duha ang nasamdan, bisan pa man nga nagpadayon pa ang beripikasyon sa mga lokal nga disaster office.
Mahinumduman nga sa miaging semana, si Presidente Ferdinand Marcos Jr. nagdeklara og usa ka tuig nga state of national calamity human miigo ang Bagyong Tino sa Visayas.
