Nisaka na sa 51 ang ihap sa mga namatay sa pagkalunod sa MV Trisha Kirsten 3 human nakarekober ang Philippine Coast Guard (PCG) og unom pa ka patayng lawas.
Matod ni Capt. Noemie Cayabyab, lima ang nakit-an sa first-deck economy area, ug usa sa accommodation area sa barko samtang anaa na karon ang mga patayng lawas sa Zamboanga City Port alang sa pag-ila.
Ingon man nga nagpadayon gihapon ang search ug dive operations bisan pa sa kusog nga sulog ug sa dili lig-on nga posisyon sa barko, nga nagsandig sa kilid niini.
Sa pagkakaron, 316 ka mga tawo ang naluwas, samtang ang gidaghanon sa mga nawala wala pa matino.
Nakatabang usab ang remotely operated vehicle (ROV) sa pagmarka sa barko nga karon giayo.
Giimbestigahan na usab sa PCG ang posibilidad sa leak sa barko isip hinungdan sa pagkalunod, samtang ang tibuok Aleson Shipping fleet kay gisuspinde sa DOTr.
