Gipasigarbo karon sa Land Transportation Office (LTO) nga nahuman na nila ang mga atraso o backlogs sa tanang plaka sa mga sakyanan gikan sa tuig 2014 hangtod 2023.
Sa pamahayag ni LTO Executive Director Atty. Greg Pua, ni-isyu sila og mga 12 milyones ka mga plaka, sa unang tuig ni Presidente Ferdinand Marcos Jr.
Giklaro usab niini nga aduna silay igong suplay ug anaa na sa proseso sa pag-apod-apod.
Usa sa hinungdan niini mao ang paggahin og igong budget aron madoble ang ilang produksiyon ug mahuman ang nag-ung-ong nga mga plaka.
Aron masiguro nga makaabot ang mga plaka sa mga sakyanan, gilusad sa LTO ang “Stop, Plate and Go” diin gipahunong ang mga motorsiklo ug gi-verify dayon kini ug gihatagan sa tukmang plaka.
Mahimo usab nga susihon sa mga motorista ang ilang plaka pinaagi sa LTO Tracker nga makita sa eGov App.
Subay niini, target sa LTO nga maapod-apod ang mga 7.5 milyon nga plaka ngadto sa mga owner sa umaabot Oktubre 31, 2025.
