Giawhag ni Defense Secretary Gilberto Teodoro Jr. ang umaabot nga mga military leaders sa Pilipinas nga padalion ang pagpalig-on sa depensa ug seguridad sa nasud, ug likayan ang bisan unsang porma sa pagkompyansa atubangan sa nagkadaiyang hulga.
Gipahayag kini ni Teodoro atol sa selebrasyon sa ika-128 nga anibersaryo sa Philippine Military Academy (PMA) sa Baguio City, gahapon Oktubre 24, 2026.
Gipasiugda sa kalihim ang panginahanglan nga mahimong mas maisog ug ambisyoso ang nasud sa pag-atubang sa mga hagit, ilabi na sa pagpanalipod sa teritoryo, soberanya, ug nasudnong interes sa Pilipinas.
Gihatagan usab niini og gibug-aton ang pagwagtang sa mentalidad sa pagsurender ug ang pagpalig-on sa kapasidad sa nasud sa pagpanalipod sa kaugalingong interes.
Matod ni Teodoro, ang mga plano alang sa seguridad nasyonal angay unta nga gisugdan na pipila ka tuig ang milabay.
Bisan pa niini, iyang gipasiugda nga kinahanglan karon nga paspason ang mga paningkamot aron matubag ang mga panginahanglan sa depensa sa nasud.
Giawhag usab niya ang PMA ug ang Armed Forces of the Philippines (AFP) nga padayon nga mopahiangay sa mga bag-ong teknolohiya ug sa nag-usab-usab nga mga hulga aron mapalambo ang ilang kapasidad sa depensa.
Gipasiugda ni Teodoro ang kamahinungdanon sa pagpalapad sa presensya sa militar ug pagpalig-on sa katakos sa Pilipinas sa pagpatuman sa mga balaod niini sa kadagatan, isip kabahin sa pagpanalipod sa nasudnong teritoryo ug interes.
