CEBU CITY- Gilibkas na sa Department of Environment and Natural Resources–Environmental Management Bureau Central Visayas (DENR-EMB 7) ang cease and desist order batok sa Prime Integrated Waste Management Inc. para sa Binaliw Sanitary Landfill sa Cebu City, human mituman ang kompanya sa mga kinahanglanon sa remediation ug operasyon.
Sa pamahayag ni EMB 7 Director John Edward Ang karong Biyernes, Mayo 1, 2026, giingon nga ang desisyon nagtubag sa dinaliang panginahanglan sa Cebu sa naglihok nga pasilidad sa basura, apan nagpabilin kini nga kondisyonal ug hugot nga ipatuman ang Environmental Compliance Certificate ug mga rekisito sa rehabilitasyon ug stabilization.
Giingon usab sa ahensya nga magpadayon ang monitoring ug compliance checks, uban sa dugang nga safety measures sama sa bag-o ug interim landfill cells, samtang ang operasyon magpadayon ubos sa mas higpit nga environmental safeguards.
Una niini, mipadayag og kasagmuyo si Cebu City Councilor Joel Garganera, Chairman sa Committee on Environment, human niya nasayran sa Executive Session niadtong Abril 28, 2026 nga balik-operasyon na ang landfill bisan pa sa padayon nga rehabilitasyon ug imbestigasyon sa makamatay nga trash-slide sa lugar.
Giingon sa mga opisyal sa syudad nga nakapahimo kini og alarma sa Konseho sa Dakbayan sa Sugbo, tungod kay wala sila gipahibalo sa maong kalamboan, samtang nagpabilin nga wala pa gibutyag ang pipila ka importanteng findings sa imbestigasyon sa insidente.
