CEBU CITY-Nakahuman na sa pagpatuman sa 7 ka mga proyekto ang Department of Engineering and Public Works o kon DEPW sa dakbayan sa Sugbo nga nagkantidad og P26.5 milyones, samtang 27 pa ang anaa na sa pipeline.
Matud pa ni Engineer Niva Bayucot, acting head sa DEPW, nga ang pito ka mga proyekto gipundohan sa Local Development Fund ug ang nahibiling 27 ka mga proyekto adunay gibana-banang P269 milyones nga pundo usab gikan sa LDF.
Dugang pa niini nga lakip sa mga nahuman ang project sa Suba nga road concreting ingon man ang duha sa Pasil samtang duha usab sa Tisa.
Nasayran nga ang proyekto sa Suba, Cebu City mikabat sa P14.1 milyones samtang ang duha ka proyekto sa Brgy. Ang Pasil nagkantidad og P5 milyones matag usa.
Ingon man nga nasaksihan ni Cebu City Mayor Michael Rama ang turnover sa P1.4 milyones sa government-renovated health center sa Brgy. Basak San Nicolas, ug ang P1 milyon nga MRF sa Basak Pardo.
Mihimo usab og pasalig si Rama sa pagpatuman og dugang mga road improvement projects nga adunay drainage components sa tanang 80 ka mga barangay sa dakbayan.
Diin tumong niini arun mahatagan og prayoridad ang mga rural barangay ubos sa iyang administrasyon nga “Operation Dugtong,” nga nagtumong sa pagdugtong sa mga bukirang barangay pinaagi sa pag-ayo sa mga karsada nga naguba tungod sa soil erosion.
