CEBU CITY- Gihatagan og gibug-aton sa usa ka legal expert nga dili basta-basta nga magamit ang legal nga prinsipyo sa “force majeure” isip basehan sa virtual attendance o video conferencing sa hawanan sa Senado.
Kini ang gipatin-aw sa kilalang abogado nga si Atty. Rameses Victorious Gatchalian Villagonzalo sa eksklusibong pakighinabi sa Bombo Radyo Cebu, taliwala sa mga sugyot nga tugotan ang online nga pagtambong sa mga magbabalaod.
Sumala ni Villagonzalo, ang force majeure o fortuitous event usa ka legal nga konsepto nga magamit lamang sa mga hitabo nga dili gayod makontrolar sa tawo sama sa gubat, pandemya, kalamidad, ug terorismo, aron ma-excuse ang usa ka obligasyon.
Ang maong katin-awan nagsunod sa pamahayag ni Senador Robin Padilla nga naghimo sa tensyon sa Middle East ug ang posibleng panagbangi sa China ug Taiwan isip rason aron ipatuman ang video conferencing imbes nga personal nga pagtambong sa mga sesyon.
Apan gipasabot sa abogado nga ang gubat mahimo lamang force majeure kung ang usa ka tawo anaa mismo sa sulod sa war zone.
Gitataw niini nga alang sa Pilipinas, speculative o usa pa lamang ka banabana ang giingong gubat sa China ug Taiwan, hinungdan nga wala kini igong legal nga basehan alang sa Senado.
Base sa giya sa Korte Suprema alang sa videoconference hearings, gikinahanglan ang mga seryosong rason sama sa state of emergency, paralisis sa transportasyon, o dinalian nga hulga sa seguridad aron kini ma-justified.
Dugang pa ni Villagonzalo, dili mahimong unilateral o personal nga desisyon lang sa usa ka grupo sa Senado ang pag-online kondili kinahanglan kini ipaagi sa resolusyon, deliberasyon, ug pagkab-ot sa quorum.
