Giaprobahan sa Senate Impeachment Court Presiding Judge Chiz Escudero ang mosyon sa prosekusyon nga ipa-subpoena ang mga bank account, tax, ug Anti-Money Laundering Council (AMLC) records ni Bise Presidente Sara Duterte.
Matod ni Escudero, ang gipangayong mga dokumento sa pinansyal ni Duterte nga naglangkob sa mga rekord gikan sa tuig 2007 hangtod 2021 nakab-ot sa mga kinahanglanon nga gilatid sa korte, ug giisip nga prima facie nga may kalabotan sa mga alegasyon ubos sa Article II mahitungod sa giingong unexplained wealth.
Nagkanayon si Atty. Remeses Victorious Villagonzalo, usa ka Sugbuanong abogado nga accredited sa International Criminal Court (ICC), atol sa eksklusibong pakighinabi sa Bombo Radyo Cebu kaniya, nga sa kinatibuk-an, dili mahimong ukabon ang mga pribadong rekord sa bangko, apan adunay mga eksempsiyon ang balaod sama sa mga kaso sa impeachment.
Suma pa ni Villagonzalo sa iyang opisyal nga pamahayag, sa kinatibuk-an dili kini pwede apan adunay mga eksempsiyon, ug usa na niana ang mga kaso sa impeachment.
Dugang pa niya, mahimo usab kini sa mga bribery cases, ug naa usab sa jurisprudence nga pwede ma-ukab sa mga isyu sa rebellion ug coup d’etat financing.
Tungod kay matod niya, specific nga impeachment ang giatubang karon, kini nga balaod ma-apply ug pwede gayod nga ma-bisto ang maong mga rekord.
