Atol sa ika-11 nga adlaw sa impeachment trial ni VP Duterte, gipresentar sa prosekusyon ang 15 ka kahon sa mga dokumento gikan sa Commission on Audit (COA), uban sa witness nga si Roderick Wamil kalabot sa kontrobersyal nga paggamit sa confidential funds.
Subay niini, gikabutyag ni Atty. Rameses Victorius Gatchalian Villagonzalo, usa ka ICC Accredited Lawyer, nga bisan pa man og wala pa mahuman ang pag-cross-examine sa mga testigo sa nagpadayong impeachment trial ni Vice President Sara Duterte, matod niya, klaro na nga gitahi sa prosekusyon ang mga transaksiyon sa pag-withdraw nga gipadayag sa mga opisyal sa LandBank.
Sumala pa Atty. Villagonzalo sa eksklusibong pakighinabi sa Bombo Radyo Cebu, gitan-aw sa prosekusyon kung giunsa pag-disburse ug pagbayad ang maong mga cash o confidential funds, diin, dinhi na maggawas ang mga iregularidad ug mapamatud-an ang pagka-ilegal sa maong mga pondo.
Si Wamil, kanhi state auditor sa COA Intelligence and Confidential Funds Audit Office (ICFAO), kinsa mitestigo nga ang pipila ka mga disbursement vouchers nga adunay pirma mismo ni VP Duterte kay non-compliant o wala misunod sa saktong lagda sa COA Joint Circular.
Angayang hinomdoman usab nga atol sa ika-10 nga impeachment trial ni VP Duterte, gibubo sa prosekusyo ang paghisgut sa Article 1, kalabot sa confidential funds, diin gipresentar ang mga transaksyon sa pag-withdraw sa minilyon nga kantidad gikan sa Office of the Vice President (OVP) ug sa Department of Education (DepEd).
