Andam ang Department of Education (DepEd) nga makig-alayon sa Office of the Ombudsman alang sa paspas ug patas nga kasulbaran sa kaso kalabot sa giingong anomalosong pagpalit sa P2.4-bilyones nga balor sa outdated laptops atol sa kataas sa COVID-19 pandemic.
Kini human gimando sa Ombudsman ang pagpasaka og kasong graft ug falsification batok kang kanhi Education Secretary Leonor Briones ug ubang opisyal.
Sa usa ka pamahayag, gikompirmar sa ahensya nga gipahibalo na kini sa resolusyon sa Ombudsman sa pagpasaka sa maong mga kaso.
Gipahayag usab sa ahensya nga ang mga opisyal nga gipailalom sa mga kaso wala nay posisyon o adunay koneksyon sa departamento.
Nagkanayon usab kini nga andam silang mohatag sa tanang gikinahanglang dokumento, impormasyon ug uban pang tabang aron masiguro nga ang mga responsable adunay tulubagon ug ang interes sa publiko mapanalipdan.
Nitumaw ang kaso human gisaway sa Commission on Audit (COA) niadtong 2022 ang pagpalit sa giingong karaan ug mahalon nga mga laptop nga nagkantidad og mokabat sa P53,000 matag usa alang sa mga magtutudlo sa mga pampublikong tunghaan taliwala sa pagbalhin ngadto sa “distance learning” human gidili ang face-to-face nga klase tungod sa pandemya.
