Nagpatuman ang Department of Education (DepEd) og 4-day onsite work alang sa tanang non-teaching personnel agi’g tubag sa mando sa Malacañang nga magdaginot og enerhiya taliwala sa tensyon sa Middle East.
Sa usa ka memorandum nga gi-isyu ni Education Secretary Sonny Angara, ang Biyernes gitudlo nga work-from-home day sa mga empleyado, lakip na ang anaa sa contract-of-service ug job orders.
Ingon man nga giklaro sa DepEd nga ang mga magtutudlo nga wala malakip sa direktiba. Magpadayon sila sa pagsunod sa ilang regular nga iskedyul sa klase aron masiguro ang pagpadayon sa mga klase ug mga kalihokan sa katapusan sa tuig sa eskwelahan.
Ang lakang sa DepEd direktang pagsunod sa Memorandum Circular No. 114 sa Palasyo nga gipirmahan ni Executive Secretary Ralph Recto niadtong Marso 6. Diin ang mando nagtumong sa pagpalihok sa mga ahensya sa gobyerno sa pagdaginot og enerhiya aron maibanan ang epekto sa pag-usab-usab sa presyo sa petrolyo tungod sa kagubot sa Middle East.
Gawas sa flexible work arrangements, gimandoan usab sa ahensya ang tanan nga mga opisina niini nga ipatuman ang mga protocol sa pagdaginot sa enerhiya. Target sa ahensya nga makunhuran ang konsumo sa kuryente ug krudo og 10% ngadto sa 20%.
Ang estrikto nga mga lakang naglakip sa pag-set sa mga air conditioner sa 24 degrees Celsius, pag-activate sa mga sleep setting sa mga kagamitan sa opisina, ug pagpalong sa mga dili importanteng suga ug elektronikong mga butang panahon sa paniudto ug pagkahuman sa oras sa trabaho.
