Positibo ang Department of Education nga wala na’y learning gap nga mahitabo sa mga estudyante sa nasud sa umaabot.
Matod ni Deped Undersecretary Michael Poa, wala’y nakita ang ilang departamento nga mahimong hinungdan sa kakuwang sa pagkat-on sa nasod kon ipatuman sa ahensya ang katugbang nga adjustment sa adlaw sa tingtungha sa mga tinun-an.
Asoy niini, nga ang DepEd masaligon nga ang pag-adjust sa School Year 2024-2025 dili makompromiso ang learning competencies sa mga estudyante sa Pilipinas.
Hinuon gipasalig sa opisyal nga makig-alayon ang ahensya sa mga magtutudlo aron masiguro ang edukasyon sa matag tinun-an nga nagtungha sa mga tunghaan.
Gani matud pa nila nga kasamtangan nilang gituki ang curriculum side niini aron magiyahan ang mga magtutudlo ug maseguro nga makat-on ang mga tinun-an inig sulod nila sa eskwelahan kada adlaw.
Kon kahinumdoman, bag-o lang nimando si Presidente Ferdinand Marcos Jr., nga i-adjust sa Deped ang school year 2024-2025 ug himuon kini gikan sa Hulyo 29 hangtod Abril 15, 2024 gikan sa orihinal nga petsa niini nga Marso 31 nga gisugyot sa Departamento sa Edukasyon.
