Gipahibalo ni President Ferdinand Marcos Jr. nga ang bag-ong itukod nga dialysis center sulod sa National Kidney and Transplant Institute (NKTI) mao ang mamahimong labing dako nga pasilidad sa dialysis sa tibuok Southeast Asia.
Tumong sa maong mega-project nga mapalapad ug mapaspas ang paghatag ug kalidad nga serbisyong medikal alang sa mga Pilipinong nag-antos sa chronic kidney disease (CKD).
Ang maong pasilidad gilauman nga masangkapan sa gatusan ka mga modernong hemodialysis machines aron ma-akomodar ang mas daghang pasyente kada adlaw.
Sumala sa Presidente, nakapaalarma ang datus diin kapin sa 11% sa mga Pilipino ang aduna nay chronic kidney disease.
Tungod niini, gipahugtan usab sa kagamhanan ang preventive healthcare ug sayo nga pag-ila sa maong sakit diha sa mga barangay health centers.
Gawas sa imprastraktura, gipasigarbo usab sa administrasyon ang dako nga tabang gikan sa Philippine Health Insurance Corporation (PhilHealth).
Gikataho nga gipataas sa PhilHealth ang package coverage alang sa hemodialysis ngadto sa ₱4,000 kada sesyon gikan sa kanhi ₱2,600, ug giapilan usab kini og hangtod sa 156 ka sesyon matag tuig aron masiguro nga libre o barato na lamang ang magasto sa mga pasyente.
Ang maong dako nga dialysis center sa NKTI gitarget nga hingpit nga makasugod sa ilang operasyon sa sayong bahin sa tuig 2028.
