Gidasig sa mga espesyalista sa kidney disease ang publiko nga magpa-check up kanunay ug magpahigayon og himsog nga pamaagi sa pagkinabuhi aron malikayan ang Chronic Kidney Disease (CKD), usa sa mga sakit nga kasagarang dili dayon mabantayan tungod kay walay klarong sintomas sa unang mga hugna niini.
Sa eksklusibong pakighinabi sa Bombo Radyo Cebu, gipasabot ni Dr. Roldan Mata, President sa Philippine Society of Nephrology Central and Eastern Visayas Chapter, nga usa sa pinakaimportante nga organ sa lawas ang kidney tungod kay kini maoy naglimpyo sa dugo, nagmintinar sa hustong balanse sa tubig ug kemikal sa lawas, nagtabang sa pagkontrol sa blood pressure ug naghimo og mga hormone nga gikinahanglan sa lawas.
Matud niya, ang CKD mao ang hinay-hinay nga pagkawala sa abilidad sa kidney sa pagsala sa dugo nga mahimong resulta sa high blood pressure, diabetes, kidney stones ug uban pang sakit nga makaapekto sa kidney.
Bisan pa niini, kasagaran walay mabating sintomas ang pasyente sa unang mga hugna sa sakit, maong importante ang regular nga blood ug urine tests aron mas sayong madiskobrehan ang problema.
Samtang, si Dr. Maria Dosado, Pediatric Nephrologist, mipasiugda sa kamahinungdanon sa sayong pagpakonsulta ug pagpailalom sa screening ilabina sa mga adunay risk factors sama sa family history sa kidney disease, diabetes, hypertension ug obesity.
Dugang ni Dr. Mata, mas epektibo ug mas sayon ang pagpugong sa sakit kaysa pagtambal niini, busa importante ang regular nga pagpacheck-up aron mapanalipdan ang kahimsog sa kidney.
Gibutyag usab ni Dr. Roldan Mata, nga sa pakigtambayayong sa Provincial Health Office ug Department of Health, maglunsad sila og community consultation ug kidney screening sa Danao karong Hulyo 11 ug sa dakbayan sa Carcar sa Hulyo 25 aron mas daghang residente ang makaangkon og libre nga konsultasyon ug screening.
