Gipasalig ni Department of the Interior and Local Government (DILG) Secretary Jonvic Remulla nga walay espesyal nga pagtratar o special treatment kang kanhi Senador Ramon “Bong” Revilla Jr.
Sa usa ka press briefing Martes, Enero 20, gibutyag sa kalihim nga personal siyang gitawagan ni Revilla human niya nahibal-an nga adunay warrant of arrest nga gi-isyu batok kaniya.
Sumala ni Sec. Remulla, giingong gisultihan niya ang kanhi Senador nga mas maayo nga mosurender na lang siya.
Gikumpirma usab sa DILG Chief nga misurender si Revilla sa Camp Crame tali sa alas 8:00 sa gabii ug alas 10:00 sa gabii niadtong Lunes, Enero 19.
Gidetalye ni Remulla nga sama sa ubang mga dinakpan, ang kanhi Senador gipaubos dayon sa standard booking ug custodial procedures ug gibasahan ang iyang mga papeles pag-abot sa Crame.
Isip kabahin sa proseso, kinahanglan nga i-surrender ni Revilla ang iyang 20 ka lisensyado nga mga armas.
Sa wala pa ang pagsurender ni Revilla, si Revilla nagpahayag sa iyang kasubo tungod sa kakulang sa hustong proseso nga miresulta sa pag-isyu sa warrant of arrest ug hold departure order batok kaniya.
Bisan pa niini, ang kanhi Senador misaad nga iyang atubangon ang mga kaso batok kaniya nga walay kahadlok ug masaligon nga ang Diyos dili mobiya kaniya tungod kay siya inosente ug nangayo og mga pag-ampo alang kaniya ug sa iyang pamilya.
