Hugot nga gipatuman sa Department of the Interior and Local Government (DILG) ang Anti-Epal Policy sa tibuok nasud.
Ubos sa Memorandum Circular No. 2026-006, gimandoan ang tanang lokal nga yunit sa gobyerno (LGUs) ug mga opisina sa DILG nga tangtangon dayon ang mga ngalan, hulagway, logo, slogan, ug bisan unsang simbolo sa mga opisyal gikan sa mga proyekto nga gipondohan sa gobyerno.
Gipasiugda ni Interior Secretary Jonvic Remulla nga ang mga proyekto nga gipondohan gikan sa kwarta sa mga magbubuhis dili angay gamiton isip personal nga “billboard” sa mga politiko.
Gipahayag usab sa DILG nga ang mga opisina sa gobyerno usa ka public trust, ug ang paggamit sa pondo sa publiko alang sa pagpalambo sa personal nga imahe supak sa Konstitusyon, sa Code of Conduct, ug sa mga lagda sa Commission on Audit (COA).
Kini gipalig-on pa sa 2026 General Appropriations Act (GAA), nga klarong nagdili sa pagbutang sa mga ngalan ug hulagway sa mga opisyal sa mga proyekto nga gipondohan sa publiko.
Gimandoan ang tanang opisyal nga ayohon ug tangtangon dayon ang mga materyales nga wala nasunod sa maong polisiya, samtang ang mga pangulo sa opisina manubag sa pagsiguro sa pagsunod niini.
Sa samang higayon, nanawagan pag-usab ang DILG, uban ni Presidente Ferdinand Marcos Jr., nga ang tanang proyekto sa gobyerno dili iapil sa epal ug personality branding, ug giawhag ang publiko nga i-report ang mga malapason.
