Ni-counterflow ang usa ka ambulansya nga niresulta sa duguong aksidente, diin usa ka menor edad nga estudyante ang nakabsan sa kinabuhi human sa panagbangga sa Archbishop Reyes Avenue flyover sa Cebu City, niadtong Martes sa hapon, Abril 14, 2026.
Ang mga imbestigasyon nagpakita nga ang ambulansya nga nalambigit sa usa ka makamatay nga aksidente sa dalan sa Dakbayan sa Sugbo mao ang mi-counterflow sa wala pa kini makabangga sa usa ka motorsiklo nga gisakyan sa duha ka estudyante sa naasoyng dapit.
Usa ka 17 anyos nga babayeng estudyante ang namatay diha-diha dayon, samtang ang 18 anyos nga drayber sa motorsiklo anaa pa sa kritikal nga kondisyon human sa bangga.
Nakabsan sa kinabuhi diha-diha dayon ang 17-anyos nga babaye nga estudyante nga nailang si Braille Nichole Kwek, samtang anaa sa kritikal nga kondisyon ang drayber sa motor nga si Juan Antonio Ladioray, 18-anyos, kinsa parehong mga estudyante sa usa ka pribadong tunghaan sa dakbayan, usa usab ka estudyante nga nagkuha og Mechanical Engineering sa samang institusyon.
Base sa inisyal nga imbestigasyon sa kapulisan, nasayran nga ang ambulansya nagdagan sa counterflow nga direksyon sa flyover samtang nagresponde sa usa ka stroke patient paingon sa ospital sa dihang nabangga niini ang motorsiklo nga gisakyan sa mga biktima.
Tungod sa kakusog sa impact, hinungdan sa pagkahulog sa duha ka sakay gikan sa motorsiklo, ug si Kwek gikataho nga naligsan sa ambulansya, nga miresulta sa iyang diha-diha nga kamatayon sa lugar.
Kasamtangan na karong anaa sa kustodiya sa Mabolo Police Station ang drayber sa ambulansya samtang nagpadayon ang pakisusi sa kapulisan aron matino ang tulubagon ug ang kinatibuk-ang detalye sa maong insidente.
Sa pikas bahin, dili lang kana ang disgrasyang nahitabo sa Dakbayan sa Sugbo gahapong adlawa, gumikan aduna say nitumaw nga disgrasya tali sa usa ko motorsiklo ug school bus sa Gov. Cuenco Ave, duol sa National Food Authority (NFA), samtang ang usa usab duol sa Población Pardo Church, diin ang motor nabalhog sa usa kasakyanan.
Subay niini, eksklusibong gikuha sa Bombo Radyo Cebu team ang habig ni Cebu City Transportation Office head Raquel Arce, aron na sa pag isplikar sa iyahang mensahe kabahin sa mga disgrasya sa kadalanan sa Sugbo.
Matod ni Arce, bisan paman sa unsa kalayo o destinasyon nga byaheon sa matag drayber, maningkamot ug huna-hunaon ang dugang pag amping ug padayon nga mabinantayon sa kadalanan, gumikan kay ang disgrasya dili matag-anan.
