CEBU CITY-Gipasiugda ni Cebu City Acting Mayor Raymond Alvin Garcia ang iyang diplomatic policy direction ug slogan nga “Resulta and Garantiya” atol sa iyang State of the City Address gahapon, Miyerkules, Hulyo 3, 2024.
Matod ni Garcia nga sa iyang paglingkod isip bise mayor, daghan ang nahimo sa 16th City Council, nga naglakip sa pagmugna sa heritage district, pagtukod og cultural awards, ug pagpasiugda sa arts and heritage preservation.
Gihatagan og gibug-aton ni Garcia ang kamahinungdanon sa diplomasya sa pagsulbad sa mga dinalian nga isyu sa kagamhanan sa dakbayan.
Gani, gipadayag sa opisyal nga iyang nakita nga adunay maayong resulta ang polisiya sa diplomasya maong iya kining ipadayon sa iyang pagserbisyo sa mosunod pa nga mga buwan.
Sukad sa iyang paglingkod isip acting mayor niadtong Mayo 10, nakigtagbo na si Garcia sa Probinsya sa Sugbo, sa Metropolitan Cebu Water District, ug sa Cebu Port Authority aron hisgotan ug sulbaron ang kasungian nila tali sa Dakbayan sa Sugbo.
Gawas sa diplomasya, usa sa gipamulong ni Acting Mayor Garcia atol sa iyang SOCA mao ang paspas nga paghatag og serbisyo sa mga lumolupyo sa syudad.
Diin lakip kini sa paghatag og prayoridad sa healthcare nga panginahanglanon sa katawhan, ang padayon nga pagtukod sa mga komunidad og mga imprastraktura alang sa panglawas, sama sa bag-o lang nga giablihan nga Super Family Health Center sa Brgy. Apas ug uban pa nga nagpunting sa kalamboan ug kaayuhan sa dakbayan.
Subay niini, gihangyo ni Acting Mayor Garcia ang tanan sa pagsuporta sa iyang mga tumong ug tinguha alang sa malampuson ug maayo nga resulta alang sa kaayohan sa tanang Sugboanon.
