MANDAUE CITY,CEBU- Personal nga gibisita ang buhatan sa Korte Suprema ni dismissed Mandaue City Mayor Jonas Cortes kagahapong adlawa Huwebes, Enero 2, 2025 aron sa pagpasala og appeal batok sa kanselasyon sa iyang Certificate of Candidacy (COC) ubos sa hukom sa Comelec en banc.
Kini aron moapelar sa pagpagawas sa Temporary Restraining Order (TRO) nga magpugong sa Commission on Elections (Comelec) sa pagpatuman sa pagkansela sa Certificate of Candidacy (COC) alang sa May 2025 midterm elections.
Si Cortes nisang-at sa iyang COC alang sa Mandaue City Mayorship bid sa midterm elections.
Magpapili siya batok kang Provincial Board Members Thadeo “Jonkie” Ouano, ang manghod ni Mandaue City Lone District Rep. Emmarie “Lolypop” Ouano-Dizon nga bayaw ni House Speaker Martin Romualdez.
Ang pag-imprenta sa mga balota alang sa midterm elections magsugod sa umaabot Enero 6.
Kung kahinumduman, niadtong Oktubre 2024, usa ka Ervin Estandarde ang mihangyo sa Comelec nga kanselahon ang COC ni Cortes.
Dinhi iyahang gibutyag, nga si Cortes mihimo og bakak nga materyal nga representasyon pinaagi sa kapakyas sa pagbutyag nga ang Ombudsman nitaktak kaniya sa serbisyo tungod sa kasong administratiba.
Ang petisyon ni Cortes sa SC nangatarongan nga ubos pa sa apela ang desisyon sa Ombudsman.
