Gipahibalo sa Department of Migrant Workers (DMW) ang pag-abli sa bag-ong batch sa financial assistance alang sa mga overseas Filipino workers (OFWs) nga naapektuhan sa krisis sa Middle East, ilabina sa Dubai ug Northern Emirates.
Matud sa DMW, ang aplikasyon para sa one-time financial aid giablihan pag-usab niadtong Biyernes, diin 1,000 ka slots ang napuno dayon. Apan gisiguro sa ahensya nga mag-abli pag-usab ang bag-ong slots sa Martes, alas 8 sa buntag.
Gipasabot sa Migrant Workers Office (MWO) sa Dubai nga ang aplikasyon ipagawas sa upat ka batch matag Martes ug Biyernes sulod sa duha ka semana aron mas mapadali ug mas mapahapsay ang proseso sa pag-aplay.
Aron mahimong kwalipikado, kinahanglan isumite sa mga aplikante ang Request for Assistance (RFA) form, kopya sa bio page sa pasaporte, Emirates ID, pamatuod sa trabaho sa gawas sa nasud, ug pamatuod sa pagkabalda sa trabaho.
Gipasiugda sa MWO Dubai nga ang matag OFW kinahanglan mo-apply kausa ra, tungod kay ang pagsumite og daghang aplikasyon moresulta sa awtomatikong diskwalipikasyon.
Ang mga kwalipikadong OFWs makadawat og one-time financial aid nga mokabat sa USD $200 o kapin sa P12,000, nga ipadala pinaagi sa remittance o kuhaon sa mga Al Ansari Exchange sa tibuok United Arab Emirates.
Sumala sa DMW, ang mga OFW nga nakadawat na og susamang tabang may kalabotan sa krisis sa Middle East dili na kwalipikado nga mag-aplay alang sa sunod nga batch.
