Mibisita si Defense Secretary Gilberto Teodoro Jr. sa PHIVIDEC Industrial Authority sa Tagoloan, Misamis Oriental, human sa mga report bahin sa giingong ilegal nga operasyon nga naglambigit sa mga langyaw nga walay dokumento ug mga Pilipinong trabahante nga nagdumala sa delikadong materyales.
Base sa inisyal nga imbestigasyon, 69 ka mga Chinese ug usa ka Pilipino ang nalambigit sa maong operasyon nga kasamtangang giimbestigahan sa mga awtoridad.
Ang pagbisita gihimo uban sa koordinasyon sa Presidential Anti-Organized Crime Commission o PAOCC, nga nangayo og tabang gikan sa Department of National Defense aron masiguro ang kaluwasan sa mga trabahante ug sa komunidad.
Gimando ni Secretary Teodoro ang Office of Civil Defense Region X nga mohimo dayon og kompletong accounting sa mga empleyadong naapektuhan sa pagsira sa pasilidad, nga nagpabiling aktibong crime scene samtang nagpadayon ang imbestigasyon.
Gimandoan usab niya ang OCD Region X nga makigtambayayong sa Department of Social Welfare and Development ug Department of Labor and Employment aron mahatagan og ayuda ug oportunidad sa trabaho ang mga apektadong trabahante.
Tungod sa posibleng risgo sa panglawas gikan sa hazardous materials, gimando usab ang komprehensibong medical examination alang sa tanang personahe nga nalambigit sa operasyon.
Nagpasidaan usab si Teodoro batok sa bisan kinsang mosamok sa nagpadayon nga imbestigasyon ug giingong adunay legal nga manubag ang mga makababag sa operasyon sa gobyerno.
Miuban kang Teodoro sa inspeksyon sila Benjamin Acorda, Antonio Sugarol, ug mga representante gikan sa Armed Forces of the Philippines ug Philippine National Police.
