Gipahimangnoan ni House Deputy Majority Leader ug kanhi health secretary Janette Garin ang publiko batok sa paggamit sa vape, tungod kay ang dugay nga paggamit mahimong mosangpot sa kamatayon.
Ang pahayag ni Garin kasunod sa report sa Department of Health (DOH) sa kamatayon sa 22-anyos nga lalaki nga may kalabutan sa vape.
Matod sa DOH, namatay ang 22-anyos tungod sa atake sa kasingkasing nunot sa grabeng kadaot sa baga.
Nasayran nga duha na ka tuig nga naggamit ug vape ang lalaki.
Gitumbok sa Iloilo First District Representative nga ang vaping dili alternatibo sa pagpanigarilyo ug dili kini mas luwas nga gamiton, dugang pa nga ang mga tiggamit sa vape mahimong hinungdan sa medikal nga kondisyon nga gitawag og e-cigarette, o vaping, paggamit sa produkto nga may kalabutan sa kadaot sa baga o EVALI.
Ang EVALI usa ka seryoso nga medikal nga kondisyon diin ang baga sa usa ka tawo nadaot tungod sa mga substansiya nga anaa sa mga e-cigarette ug vaping nga mga produkto, sumala sa Yale Medicine.
Sa laing bahin, ang Global Youth Tobacco Survey nagbutyag nga gibana-bana nga usa sa pito ka mga batan-on, nag-edad og 13 ngadto sa 15, karon naggamit og vape.
