Giklaro sa Department of Finance (DOF) nga dili kini bag-ong buhis, kondili ang pagpatuman sa single tax rate nga 20% sa tanang kita sa interes gikan sa mga deposito aron mawagtang ang dili makiangayon nga sistema nga mopabor sa mga adunahan nga adunay long-term deposits.
Kini human makadawat og bug-at nga pagsaway sa publiko kalabot sa mga probisyon sa Capital Market Efficiency Promotion Act (CMEPA), partikular na sa isyu sa taxation of interest gikan sa mga deposito sa bangko.
Gidugang sa ahensya nga ang 20% nga buhis sa interes anaa na sukad pa niadtong 1998 sa wala pa ang pagpatuman sa CMEPA, nga nahimong epektibo niadtong Hulyo 1, 2025, nga nagtangtang lamang sa nangaging mga exemptions ug preferential rates, sama sa 0% nga buhis sa mga depositor nga adunay kapin sa lima ka tuig, 5%–20% nga buhis sa mga short-term deposits, ug 15% nga buhis sa mga deposito sa dolyar.
Kung magdeposito ka og P100,000 sa bangko nga adunay 2% annual interest, mokita ka og P2,000 human sa usa ka tuig. Apan human ma-deduct ang 20% tax (equivalent to P400), P1,600 na lang ang imong nahabiling interest.
Sumala sa DOF, 99.6% sa kinatibuk-ang deposito ang gipaubos kaniadto sa 20% nga buhis. Ang CMEPA giingon nga gituyo lamang aron mahimo kini nga ‘patas’ alang sa mga long-term ug short-term depositors.
Giklaro pa sa ahensya nga dili kini retroactive, nagpasabot nga ang mga daan nga deposito nga gihimo sa wala pa ipatuman ang balaod magpabilin nga sakop sa nangaging mga benepisyo sa buhis.
Gawas pa sa 20% nga buhis mao ang savings ubos sa SSS, GSIS, ug Pag-IBIG (sama sa MP2) nga nagpabiling tax-exempt.
