CEBU – Gihingusgan sa Department of Health sa Central Visayas (DOH-7) ang surveillance activities batok sa monkeypox sa rehiyon ug gitambagan ang publiko nga ang mga lakang sa COVID-19 makatabang usab sa paglikay sa sakit.
Sa usa ka pamahayag nga gipagawas gahapon Sabado, Hulyo 30, ang DOH -7 mipasalig sa publiko nga ang departamento mi-activate na ug mipakusog sa ilang surveillance activity alang sa monkeypox niadto pang Mayo ning tuiga ug nakakolekta na og specimen gikan sa probable cases nga sa ngadto-ngadto nihatag og negatibong resulta sa test.
Gipasalig usab sa DOH-7 nga ang mga kadagkoan sa mga pasilidad sa panglawas sa Central Visayas gitambagan ug andam nga modawat sa posibleng kaso sa monkeypox alang sa isolation ug pagtambal.
Dugang pa sa DOH central office nga ang kaso sa monkeypox na-detect sa Pilipinas sa unang higayon.
