Gipasidunggan ang Mandaue City Health Office (CHO) human kini nakadawat og daghang awards gikan sa Department of Health-Central Visayas Center for Health Development (DOH-CVCHD) atol sa Public Health and Universal Health Care Summit 2025.
Sa pagbisita sa CHO personnel, pinangulohan ni Dr. Debra Maria Catulong, pormal nilang gipresentar ang ilang pasidungog isip 3rd Place sa Barangay Health Workforce (BHW) Bantay Konek Awards.
Ang maong award nag-ila sa mga local government units ug indibidwal sa ilang magmalampuson nga pagpatuman sa BHWConnect program ug pagpangusog sa mga serbisyo pang-panglawas sa komunidad.
Nakab-ot usab sa CHO ang pag-ila sa lain-laing aspeto sa Universal Health Care (UHC) implementation, lakip na ang Establishment of Health Service Delivery Division and Health Systems Support Division, Health Care Provider Network, Operationalization of the Special Health Fund, Expanded Local Health Board, UHC Integration Site, ug ang ilang kontribusyon sa Disaster Risk Reduction and Management in Health (DRRMH) sa rehiyon.
Nadawat usab sa CHO ang pasidungog tungod sa best practices ug mga inisyatiba sa siyudad sama sa immunization, contraceptive implant program, women’s health screening, Pink Corner Initiative, ug ang Cancer Navigation Clinic Program.
Lakip sa maong pag-ila ang pagturn-over sa P250,000 nga cheque isip suporta sa CHO human niini nakab-ot ang 90% Functional Level under the UHC Local Health Systems Maturity Levels. Ang maong kantidad itagana alang sa dugang pagpalambo sa mga programa ug serbisyo sa dakbayan.
Padayon usab nga gitinguha sa departamento nga makab-ot ang Philippine Medicines Policy Framework recognition, aron masiguro ang mas lapad nga access sa dekalidad, barato, ug luwas nga tambal alang sa mga Mandauehanon uban ang lig-on nga suporta sa lokal nga kagamhanan.
