Naglatid ang Department of Health – Central Visayas (DOH-7) og mga programa kalabot sa World Blood Donor Day, diin mao kini ang higayon nga mahatagan og pagtagad ang mga nagkadaiyang indibidwal nga boluntaryong ni-donate og dugo ngadto sa mga nagkinahanglan niini.
Ang pagsaulog sa World Blood Donor Day, magsubay sa theme nga “Magbigay ng dugo, magbigay ng pag-asa: magkasama tayong nagliligtas ng mga buhay.”
Sa gipahigayon nga press conference sa DOH Central Visayas, gahapong adlawa, Hunyo 16, 2025, nasuta nga kuwang pa gihapon ang mga naka standby nga dugo sa mga nagkadaiyang local health facilities sa rehiyon-7, apan bisan paman sa kakuwangan sa supply, wala ra usab sila nakatala nga wala sila nakahatag sa mga katawhan nga nagkinahangalan niini.
Busa, gi-awhag sa maong buhatan nga padayon sa pakig alayon ang Red cross, mga pribadong mga ospitals, ug uban nga mga organisasyon sa padayon nga pagkolekta ngadto sa mga blood donors nga boluntaryo, ug anaa sa pangidaron nga 16-65 anyos lang ang eligible.
Matod ni Dr. Mar Carlo T. Alcontin, Medical Officer III—DOH 7, nga taliwala sa nasinati niini nga shortage sa dugo, motubag ug motunol ra gihapon sila sa mga pasyente nga nagkinahanglan niini. | via Bombo Irene Ardiente
