CENTRAL VISAYAS- Mipasidaan ang buhatan sa Department of Health – Central Visayas Center for Health Development (DOH-7) sa mga sayop nga impormasyon nga maylabot sa sakit nga Human Immunodeficiency Virus (HIV) nga nagpasamot sa stigma sa rehiyon.
Kusganong gihimakak sa DOH-7 ang mga pipila ka post sa mga social media platforms nga matod pa nag-ingon nga ang ilang ahensya kay mihisgot kabahin sa usa ka indibidwal nga nagpakatap sa HIV.
Sumala sa ilang public advisory, gipunting sa buhatan nga hugot nilang gipanalipdan ang tanang impormasyon sa mga pasyente nga nagpositibo sa sakit ma buhi pa man kini o wala na.
Nagsubay kini sa balaudnong RA 11166 (Philippine HIV & AIDS Policy Act) nga nagpanalipod sa matungod sa matag indibidwal.
Pahimangno sa DOH-7 sa publiko nga ang paghingan o pag-akusar sa bisan kinsa nga wala miagi og saktong legal nga proseso ay usa ka kalapas sa ilang katungod ug makapasamot pa hinuon sa stigma ug diskriminasyon ilabi kadtong mga nagpadayon sa kinabuhi nga nagbitbit sa maong sakit.
Gitudlo sa ahensya nga ang stigma ug diskriminasyon ang nag-unang salimuang sa pagtubag sa epidemya sa HIV.
Gani makapaluya pa kini sa paningkamot sa natad sa panglawas sa publiko ang pagtukod og mas inklusibo, maamumahon, ug himsog nga komunidad.
Uwahing awhag sa DOH-7 sa tanang nga mosalig lamang sa ilang mga opisyal nga komunikasyon alang sa tukmang impormasyon kabahin sa maong sakit ug mga kasikbit nga mga serbisyo niini.
