Gidasig sa Department of Health (DOH)-7 ang mga ginikanan nga dili mahadlok sa programang libreng bakuna sa gobyerno alang sa mga estudyante.
Gipasabot sa ahensya nga importante ang pagbakuna aron mapanalipdan ang mga bata batok sa mga seryosong sakit.
Gipadayag kini ni Dr. Van Philip Baton, OIC-Chief sa Local Health Support Division sa DOH-7 Center for Health Development.
Matod ni Baton, dako ang risgo sa pagkahitabong mga outbreak sa Central Visayas, ilabi na sa mga sakit sama sa measles, rubella, tetanus, diphtheria ug human papillomavirus o HPV.
Naghiusa ang DOH-7 ug ang Department of Education (DepEd)-7 alang sa usa ka press conference sa ilang regional office uban sa mga miyembro sa media.
Tumong niini nga matubag ang mga pangutana sa publiko ug matul-id ang sayop nga impormasyon kabahin sa pagbakuna nga mikaylap sa social media.
Gipasabot ni Dr. Baton nga ang tumong sa DOH sa paghatag og bakuna mao ang pagpanalipod sa panglawas sa publiko, ilabi na sa mga bata, ug dili ang paghatag kanila og kadaot.
Giklaro usab niya nga luwas ang mga bakuna bisan pa man nga adunay posibilidad nga makasinati og gagmayng epekto human sa pagbakuna, mas maayo nga mapanalipdan ang mga bata pinaagi niini kaysa biyaan silang bulnerable sa mga impeksyon ug seryosong sakit.
