Niinsistir ang Department of Health (DOH) nga panahon na nga bag-uhon ug i-update ang mga disaster response plans, partikular na sa health sector, isip pagpangandam sa posibleng epekto sa magnitude 7.2 nga linog nga maka-trigger sa West Valley Fault.
Si DOH Secretary Teodoro “Ted” Herbosa nagkanayon nga ang kasamtangang plano, nga gimugna niadtong 2012 ug base sa pagtuon sa Japan International Cooperation Agency (JICA) niadtong 2003, wala na sa panahon.
Gitataw niya nga daghang mga ospital ug imprastraktura sa Metro Manila ang nausab, mao nga kinahanglan kini nga susihon.
Nanawagan usab ang kalihim sa pag-retrofitting sa mga daan nga edipisyo ug pagsiguro nga ang mga bag-o makasukol sa linog.
Dugang pa niya nga ang mga “soft preparations” sama sa training, protocols, ug logistics tutokan usab.
Gianunsyo usab sa kalihim nga ang Rehiyon 3 (Central Luzon) maoy mag-unang tinubdan sa tabang sa Metro Manila kon adunay mahitabong kalamidad.
Kalabot niini, ang Pilipinas ug Japan mohimo ug laing pagtuon sa epekto sa “The Big One” sa mosunod nga duha ka tuig.
