Nagpasidaan ang Department of Health (DOH) nga ang Mindanao padayon nga nameligro sa pag-ulbo sa tipdas ug rubella tungod sa daghang mga bata nga wala pa makadawat og routine immunization.
Sumala sa DOH, gibanabana nga 520,645 ka mga bata nga nag-edad og singko paubos sa Mindanao ang wala pa mabakunahan batok sa measles ug rubella.
Human sa pagtapos sa Measles-Rubella and Supplemental Immunization Activity (MR-SIA) sa lugar niadtong Biyernes, ang ahensya nakaabot lang sa 82% sa target niini. Diin ang DOH nagplano nga bakunahan ang 2.8 milyon nga mga bata sa Mindanao ug sa Bangsamoro Autonomous Region in Muslim Mindanao (BARMM), o adunay 95% nga coverage, aron makab-ot ang herd immunity.
Gipasabot ni DOH Secretary Teodoro Herbosa nga kung daghang mga tawo ang wala mabakunahan, ang virus mas paspas nga mokatap, nga moresulta sa mas paspas nga pag-ulbo.
Namatikdan usab ni Herbosa nga ang balik-balik nga kapakyasan sa pagkab-ot sa mga target sa pagbakuna sa bag-ohay nga mga tuig nagdugang sa gidaghanon sa mga bata nga wala mabakunahan, nga nagpagrabe sa risgo sa usa ka outbreak.
Busa, gipahinumdoman sa DOH ang mga ginikanan ug tigbantay sa mga bata nga sigurohon nga ang ilang mga anak mabakunahan.
Samtang, gisuportahan sa Imam Council of the Philippines ang mga programa sa pagbakuna sa gobyerno, nga nag-ingon nga dili kini supak sa mga pagtulon-an sa Islam.
