Nakatala og pagkunhod ang Department of Health (DOH) kabahin sa gidaghanon sa mga naangol tungod sa pabuto sukad sa pagsugod sa panahon sa kapaskuhan.
Base sa datos sa DOH gikan Disyembre 21 hangtod 26, adunay kinatibuk-an nga 57 ka mga naangol tungod sa pabuto ang natala sa tibuok nasud, usa ka 48 % nga pagkunhod kon itandi sa parehas nga panahon sa miaging tuig.
Samtang ang Metro Manila nakatala og pinakataas nga gidaghanon sa mga naangol tungod sa pabuto nga anaa sa 25, ug ang labing naapektuhan nga grupo sa edad mao ang mga batang lalaki nga 10-14 yrs old.
Subay niini, ang pangunang hinungdan sa mga naangol mao ang pabuto nga 5-star, kwitis, Boga ug Triangle.
Busa, niining bahina, gipahinumdoman pag-usab sa DOH ang mga tawo nga likayan ang mga peligro sa pabuto. Isip alternatibo, pagtan-aw og pabuto sa mga gitudlo nga lugar ug likayi ang pagkuha og mga pabuto nga wala pa mobuto.
