Nipagawas og bag-ong guidelines ang Department of Health (DOH) aron mapugngan ug matubag ang epekto sa panglawas sa grabeng kainit, subay sa mando ni Presidente Ferdinand Marcos Jr.
Sa bag-ong guidelines, nalatid sa Department Memorandum No. 2025-0114, diin gimanduan sa DOH ang tanan nga mga unit niini, lakip ang mga ospital ug pasilidad sa panglawas nga gidumala sa mga departamento, sama sa “Bagong Urgent Care” ug “Ambulatory Services (BUCAS) centers”, sa pagpatuman sa estratehiya batok sa grabeng kainit.
Gimandoan usab sila nga makig-alayon sa mga lokal nga kagamhanan pinaagi sa “PuroKalusugan” nga mga programa, nga gipaila atol sa National Health Sector Meeting.
Lakip usab sa mga guidelines ang pagsiguro sa kaandam sa mga pasilidad sa panglawas ug mga kawani sa gobyerno, pagsabwag sa impormasyon sa panglawas aron matudloan ang publiko kon unsaon pagpabiling luwas sa grabeng kainit nga nasinati sa nasud, ug pag-establisar og mga cooling center sa mga air-conditioned o ventilated nga mga dapit duol sa mga rota sa pampublikong transportasyon.
Samtang hatagan og prayoridad ang mga tigulang, gagmay nga bata, mabdos, ug mga tawo nga adunay mga kakulangan.
Dugang pa, ibutang ang mga hydration station sa tanang pasilidad sa DOH, ilabi na sa pinakainit nga mga oras sa adlaw gikan sa alas 9 sa buntag hangtod sa alas 4 sa hapon, ug ipatuman ang detection ug monitoring sa heat-related nga mga sakit.
Samtang, si DOH Secretary Teodoro Herbosa niingon nga andam ang ahensiya sa pag-atubang sa grabeng kainit sa panahon ug gitambagan ang mga Filipino nga susihon kanunay ang heat index forecast sa PAGASA (Philippine Atmospheric, Geophysical and Astronomical Services Administration) sa inyong mga lugar.
Gipahinumdoman usab niini ang mga tawo nga kanunay magsul-ob og luag, puti, ug gaan nga mga sinina sa panahon niining init nga panahon.
Para sa mga emerhensiya, tawag lang sa DOH hotline number sa 911, 1555 o 143 para sa Philippine Red Cross.
Ang mga lakang sa DOH gipatuman agig pagpangandam sa gipaabot nga mas init nga mga adlaw, nga gitumong sa pagpanalipod sa panglawas sa publiko ug pagsiguro sa kaandam bahin sa pagtaas sa temperatura sa tibuok nasod.
