Nipahigayon og Profiling ang Department of Labor and Employment Region 7 sa mga liboan ka mga empleyado nga naggikan sa micro, small, medium enterprises.
Ang maong profiling sa mga empleyado gitagana ngadto sa Amihanag bahin sa Sugbo nga maoy labing apektado sa magnitude 6.9 nga linog nga niigo niadtong Setymbre 30, ug inabagan usab ang DOLE sa Local Govenment Unit (LGU).
Sa gikabutyag ni Atty Roy Buenafe ang Regional Director sa DOLE-7 ang subra liboan ka mga empleyado mao ang makadawat sa mga intervention sa TUPAD o “Tulong Panghanapbuhay sa Ating Disadvantaged/Displaced Workers” o kini alang sa mga displaced workers.
Giklaro ni Buenafe nga kini nga mga klase sa empleyado dili ma konsiderar nga “disadvanatage displaced workers” tungod kay ilahang mga gitrabahuan nangaguba ug dili pa maka-function.
Busa, sukad niadtong Oktobre 1, wala na silay panginabuhian, ug ang DOLE mao ang mo take-over pamaagi sa pagpanghatag og assistance nga nagsubay sa bag-ong usbaw sa sweldo sa Central Visayas nga P540 per day ug kini sulod sa 10 ka adlaw, diin sa kinatibuk-an, adunay P5400 pesos ang madawat sa mga empleyado.
Gitataw usab niya nga sa pagkakaron, nagpadayon pa ang ilahang profiling nga nagtumong sa pag-atiman sa mga apektadong emplayado sa linog.
Sa pikas bahin, nadayeg usab niini ang mga magpapatigayon nga nagpadayong naghikutar sa mga gilangkobang empleyado, bisan paman nga usa usab sila sa mga biktima sa kalamidad nga bag-o lang nitumaw.
