CEBU – Gipahibalo sa DOLE Central Visayas nga nakigtagbo ang mga opisyal sa BOMEDCO pinaagi sa usa ka coordination meeting arun nga istoryahan ang sitwasyon sa mga empleyado sa naasoy nga milling company human nga maapektohan sa giingong wala na’y klaro nga operasyon.
Matud pa ni DOLE 7 Regional Director Dr. Lilia Estillore nga wala na’y kasiguradohan ang status sa gibana-banang 240 ngadto sa 300 ka mga empleyado sa maong kompanya hinungdan nga adunay interbensyon niini ang ahensya.
Nasayran nga aduna na’y pipila ka mga empleyado nga nahatagan ug financial assistance ug scholarship programs.
Sigon pa, rason sa BOMEDCO nga nagkuwang na sila sa tapasero hinungdan nga dili na sila maka-operate ug full volume.
Giingong adunay mga tapasero nga dili na ganahan mag-tapas ug misulod na sa construction.
Sa habig ni Medellin Vice Mayor Juan Alfonso Lim, usa sa mga board member sa Cebu Planters Association nga dili rason nga nagkuwang na sa tapasero ang BOMEDCO gumikan kay ang problema nagsugod paghuman gayud sa bagyong Yolanda.
Tinuod nga migamay ang production, apan aduna pa’y daghang ‘involve’ nganong dili na makahatag ang maong kompanya ug maayo nga recovery sa mga produkto sa tubo.
Gituohan ni Lim nga dugay nang wala magtagad ang BOMEDCO sa pag-modernize sa ilahang mga equipments hinungdan nga duda niini, na-bangkarota na ang naasoy nga milling company apan wala lang kini nila giangkon.
Nagkanayon kini nga dili na mapuslan ang maong kompanya gumikan sa pagka-walay klaro sa mga opisyal niini ug kanunay nga pakiglalis sa mga planters.
